專欄

早前我在節目同大家分享不問價追中國神華（01088.HK），早上22蚊推介時，估唔到好多朋友立即去搵輪，在正股$22.95到$23時，竟然有朋友已經傳訊息過來講多謝。除了神華之外，大家可以發現小炒王大力建倉煤炭相關股份，記唔記得一兩年前煤股熱炒嘅時候，易大宗（01733.HK）同蒙古焦煤（0975.HK）短時間內爆升幾倍，市場正正炒緊呢個味道。

今次叫大家買中煤能源（01898.HK），公司在上市煤企中走勢比較落後，人哋兗州煤業（01171.HK）同神華一早就破頂再破頂，中煤能源就仲未到52周高位$4.36，小炒王覺得追落後的機會好大，梗係不問價衝。

但係其實中煤係有幾個潛力可以令佢股價突破$4.36後直衝5蚊，唔講大家未必知，一講就可能「叮」一聲，係喎！

第一個原因：

我講過上周五多部委支持有條件煤炭企業之間實施兼併重組，神華國電率先合併成為先例，股價照推算係會愈來愈好，因為咁先吸引到其他煤企跟隨。

係呢個時候，小炒王可以講中煤好大機會係下一個重組目標。睇返中煤官網，其實中煤除了煤炭生產與貿易、煤化工、裝備制造之外，其實仲有埋工程建設同埋電力兩個業務。根據網頁資料顯示，中煤集團以調整產業結構、消納自產煤為目標，發展環保型坑口電廠和參股建設下游電廠項目，形成現有控股和參股發電廠 24座，總裝機1141萬千瓦，權益裝機446萬千瓦。

講到呢度，大家係咪諗到多部委講嘅煤電合併嘅扶持方案，小炒王認為中煤已經有煤電的雛型，未來若果出手同某啲電力集團合併，隨時好大機會係神華翻版，股價因此爆升幾成。

第二個原因：

大家知唔知點解中煤比其他煤股弱？市傳有一個原因，就係其股東身上。根據港交所嘅股權披露，中煤能源大股東就係富德生命人壽保險股份有限公司，市傳係肖建華的明天系入面，而明天系同安邦系資產開始重組，中煤隨時成為下一個試點之一。

若果大家真係有留意新聞，上星期明天系有隻股份就異動起來，講緊嘅係恆投證券（01476.HK），喺上星期三，9名股東與中信國安集團訂立框架協議，出售合共7.79億股內資股，股價一早由$2.95大升到$4.8呢個水平，單日升過六成，呢幾日回返啲都有$3.42，都有15%左右的回報，所以一旦中煤跟住重組的話，隨時單日升到幾成， 講到呢度大家係咪即係「叮」一聲，明晒。

煤炭股會係未來幾個月的重中之中，一齊不問價追。