專欄

【不問價追】第一季不問價追

小炒王相信第一季港股勢將創歷史高位,所以大家要好好把握。

小炒王剛剛從歐洲返港,落機當日港股大升500點,仲突破埋30,000點呢個大關口,既然聞到陣牛市味道,小炒王都忍唔住拎緊行李個刻就開始落盤,趕得上呢個牛市列車。

記得係上年11、12月嘅時候,恒指由高位回調咗近二千點,好多股都見52周低位個時,市場上都唔少聲音話牛市玩完。但近日大市突破之後,已經有部份人都已經唔敢再去上返車。小炒王一直都堅信呢個係前所未見過嘅超級大牛市,而近日港股呢個突破,小炒王相信第一季港股勢將創歷史高位,所以大家要好好把握。

假如順利在第一季突破到07年高位32,000的話,大市首個目標自然係35000至38000點,港交所(00388.HK)、滙豐(00005.HK)係必要之鎮倉之寶,更有可能有多過十隻以上嘅倍升基金股,如果大家仲未做好準備嘅話,就要畀多啲心機去研究一下,當然小炒王都會同大家一齊發掘更多好嘅股票。

好簡單嘅例子,17年大升嘅股除咗恒大(03333.HK)、融創(01918.HK)呢啲幾倍內房,吉利(00175.HK)、華晨(01114.HK)爆升車股之外,其實仲有好多特別嘅股份,例如做CAR-T嘅金斯瑞(01548.HK)、SHABU SHABU呷哺呷哺(00520.HK)都表現強勁,小炒王希望18年可以同大家一齊搵到呢類倍升股去不問價追。