專欄

彈完三日又散，頂住29000點！小炒王先講咗三個大位，若果用黃金比率去計反彈，粗略有三個位，28800點、29200點同29500點，但係若果呢個唔係反彈，而係繼續上升，即係話跌2000點只係調整嘅話，小炒王覺得就應該諗下，下一浪帶領個市上升嘅係邊隻，其中一隻相信係滙豐銀行（00005.HK），明年紅底機會好大。

點解講滙豐？因為平保（02318.HK）的大動作令人無限聯想。細心啲睇，平保呢招叫價值投資，用萬億資金堆砌出一個主題。平保增持滙豐至5.01%，再出手於工行（01398.HK）身上沽A買H。呢次擺明係做差價，成個行動好醒目，下年好有機會其他大佬會跟隨。

今期先講工商銀行，先從技術走勢去睇，佢由10月個高位$6.48見短期頂開始回落，回足兩個月到近日$5.9呢個水平，28100點時佢低見$5.86，近日個市彈佢只係彈多少少到5.96，小炒王覺得咁大隻工商銀行，回咗落來可能係建倉的機會，尤其係資本新規下，長遠利好金融股，同埋好多業務會由表外重回表內，有危同時有機。

另外，小炒王選工行有第二個原因，就係近日平保沽A買H，呢個動作話咗你知大戶點睇AH 差價，而大家權益一樣，未來除平保之外，會有更多大佬跟隨，大家可以睇下A股工商（5.84元人民幣），相對股價6.893港元，即係好簡單咁睇，未來會隨時縮減呢個差價，最理想係A股升慢啲，H股升返快啲，但係好多時Equilibrium呢樣嘢，會係A股回返少少，H股漲返啲去達成，個Equilibrium Point 當住係大家嘅平均，即係$6.5水平。

最近中金出咗份報告，指內銀股將進入市場重估第二階段，報告以三大周期闡述內銀潛在重估潮，首先是宏觀及資產質量周期，指佔行業不良貸三分之二的的製造業及批發、零售行業企業產品價格和利潤率快速恢復；規模以上企業盈利水平維持高位；及銀行資產質量先行指標多季度持續改善。中金料內銀行業不良率在2018至2019年小幅下降，務實重估基礎。

中金指出內銀第二支柱是利率周期。雖然存款競爭預計維持激烈，佢哋認為內銀行業資產定價的收益能覆蓋成本上漲，對銀行業未來兩至三年息差改善持樂觀態度。第三是監管周期，料未來兩至三年內的監管重點將維持在防範影子銀行風險、逐步降低槓桿等方面，客觀上強化了銀行信貸在社會融資結構中的地位，有助於行業穩定向好。行業股本回報率（ROE）料基本穩定。