因為因日中的跌盪而灰心係好難得到勝利的，更明顯是大家對買的股票無信心，所以弄得「頻頻撲撲」的下場。
過去一星期小炒王終於放一個長假期了，港股由年頭升到年尾，當然中間跌盪少不免，但大體趨勢向上，如果去年11月有留意我接受《壹週刊》訪問，提到2017年目標價是28500點（當時恒指仲死死吓，得21000-22000點）相信大家都大賺了，雖然過程並不輕鬆，但可以力排「2017股災言論」，相信都可以說看中了，自己的身家都進帳了。但問題係，點樣保住盈利唔輸返出來？
2015年港股大時代，錢來得快去得快，好多時見到戰友守唔到盈利仲要將個「本」嘔突，呢個係最壞情況，所以「贏在帳面上」是無用的，最緊要是保住最大優勢。試望望自己戶口？到底你進攻之後，有冇做到防守？
咁到底呢一浪我睇幾多？太遠的預測我唔想講，因為做得直播多，一講得遠，啲觀眾都會「噓」一聲，哈哈，因為大家都唔會望到咁遠，只顧短期甚至眼前的變化，好多時我在Facebook 收到大家的留言都係全日最低位之時，跟住我就望一望就走開，因為因日中的跌盪而灰心係好難得到勝利的，更明顯是大家對買的股票無信心，所以弄得「頻頻撲撲」的下場。破大頂是肯定的，32000點都不是我的目標，其實現在一試到30000點，大家都「衝、衝、衝」是一個壞習慣來的，一遇到大位，來回跌盪是肯定的，一跌400點都已經叫「股災」，相信又是不成熟的表現。這個大位肯定回試幾次吧，試想，邊有聰明人30000點先去買貨？買嘅都等回調吧！
很開心同大家分享，小炒王得到了2017年度的大本鐘獎，更遠赴倫敦領獎，順道遊覽一下，拿獎是一種鼓勵，更係讓別人認知小炒王的一個途徑，在此，多謝大家的支持。
我同大市，相信好快會「I will be back」！
