專欄

小炒倉之前一注獨贏佳兆業（01638.HK），開頭都有點擔心，但之後聽到老前輩一番話，小炒王對佳兆業嘅信心增加咗好多，話晒佢在深圳都幾多地，截至2016年底，佳兆業持有2100萬平方米的土地儲備，而約有80%的土地位於一線城市及二線重點城市，比起幾大爆升內房中，佳兆業嘅質地唔錯，遲早會價值大回歸。翻查資料，小炒王梗係順藤摸瓜咁查落去，週末比小炒王搵到一間好有潛力嘅公司，佢就係佳兆業大股東揸咗29%的美加醫學（00876.HK）。

講返歷史，美加醫學前身係永利控股，拆咗隻永利地產（00864.HK）上市後賣殼，15年大時代時曾經炒過去$0.9左右，其後就落返去起步位。去年11月郭英成三度出手，以合共3.9億元掃入美加醫學逾21%股權，成為公司大股東。翻查資料，郭氏以0.36元入咗2.7億股，之後0.52元，再入多1.91億股，0.52元入左3.7億股等等，睇返幅圖，郭嘅成本價大約係0.46元左右，現價0.36元來睇都真係好吸引。

公司最近宣佈以0.4元溢價供股，3股供1股籌5.4億元而包銷商就係佳兆業，大家可能聽到供股就怕怕，係咪諗佳兆業係咪出術㗎？但係好少聽過公司會溢價去供股，大部份超大折讓，例如十三集團（00577.HK）供股又合股，所以小炒王覺得美加醫學今次供股，佳兆業誠意分十足，都可以話算厚道。若果大家細心一點睇下呢次供股，只要有小部份人唔供，佳兆業就可以成為超過3成嘅控股股東，結果公布結果後，果然由佳兆業拎晒。更重要嘅係呢個過程唔使行General Offer， 同時間供咗5億資金後，公司資金充足，又可以即刻用得，隨時開始熱炒。

如果大家睇返新聞，佳兆業共有土地儲備近2200萬平方米，當中55%位於粵港澳大灣區，郭英成表示即使一二線城市的房地產調控將成常態，但在城市更新的過程中仍有很多潛在發展機會。而截至目前，佳兆業已建立了旅遊、科技及大健康產業佈局, 而集團在城市更新項目當中產生了不少醫療用地，早前參與美加醫學供股可產生協同效應，完成該次供股後亦不排除繼續收購其他項目。小炒王相信美加醫學將來會係佳兆業嘅醫療地產旗艦，相信今次供完股後會加速成長，所以股價係0.4元樓下，梗係同大家推介，好值得用不問價追系列。