專欄

【不問價追】時光倒流11年

想透過呢一張10年嘅單話畀大家聽,死揸爛揸長達10年的股份未必係明智之舉,有時「分手要狠、斬得乾淨」先係聰明之選。

換季時間,大部份女士都會在屋企埋頭苦幹執嘢,咁大堆衫褲鞋襪點樣處理呢?且慢,呢個都唔係呢篇文嘅重點,最大發現係我搵到一張屬於2006年1月嘅銀行股票單據!2006年我都仲未返工,仲係一個學生,所以呢張單唔屬於我,係屬於我屋企人。當日係櫃桶底見到呢一張單,感覺好可笑,我深深體會到乜嘢係好股;乜嘢係醜股?就等我公開你呢張單據畀大家睇,睇吓有幾神秘!

2006年,我手頭上只有新股,真正嘅買賣唔多。呢張單大部份都係買大股(一般投資者都會咁做),總值180,000,但每注分到好細,總共買成11隻股。當中睇到最眼突就係見到當年嘅思捷環球(00330.HK),2006年1月,價值$67.45,依家呢?真係跌足九成,$7都冇,除咗慨嘆兩個字,我真係諗唔到更加好嘅形容詞,可幸係,當年屋企人已經丟咗隻思捷,真係算好好彩!否則坐足十年都係得個桔。跟手睇埋隻中石油(00857.HK)當年價值$7.55,10年人事幾番新,中石油依家只係響$5嘅水平徘徊,油價升跌佢唔郁,有咩好消息都當壞消息睇,現時叫人買中石油慘過冇推介,所以不提也罷。

睇返啲「揼心貨」,眼球即時望落去中人壽(02628.HK),$7.75究竟係咩玩法?還記得當年中人壽在港股直通車時期,升到幾十蚊,之後$7水平從來冇見過,我還記得06年坐在班房有同學大叫$9.9的中人壽好抵,當時我已經心郁郁想買,不過唔多夠錢只夠買一手,最終放棄買入中人壽,結果飲恨多年。再望埋中移動(00941.HK)當年只係$37.7,一手500股,都係萬零蚊貨仔,你話中移動咁衰冇咩增長,只係隻長線收息股都好,10年來佢翻咗兩番,對股東絕對有交代。

小炒王比較買中型股都有原因,一直喜歡買的國航(00753.HK)多年來有起有跌,識得走位的話,逢$5樓下吸都唔會變死股,當年$2.625呢個價,除咗06年,股市低迷時亦有見過,下次留意呢啲筍位吸納,因為一彈起,又回到$9身邊。成張單,得一隻股轉咗冧把,就係和黃(當年13號,現時改名長和,成為1號),成日聽前輩講,當年好多人持有和黃,都係相信誠哥實力,收息多年仍然在$100附近,增長唔算多,但又衰唔晒,你不如問下自己「會唔會不斷捉住隻股份只係收息又對佢感情不變呢?」

成篇文唔係想「話當年」,係想透過呢一張10年嘅單話畀大家聽,死揸爛揸長達10年的股份未必係明智之舉,有時「分手要狠、斬得乾淨」先係聰明之選。當然,一啲你認為具有增長潛力嘅股份,就千祈唔好放手,倍升股就自然會在你身邊徘徊,陪你渡過漫長嘅投資之路。