專欄

【不問價追】不問價追兩板塊

車股輪流炒,得勢不饒人先有吉利,繼而長城,隨後就會係廣汽(02238.HK)、東風(00489.HK)、北京汽車(01958.HK)。

時來運到嘅嘢有時好難解釋,早排推介的落後股,永遠要大家等三至五日先有糊食,結果⋯⋯梗係被人「追到瘦」啦,日日問幾時開車等的問題,有時我笑笑口都唔知點答,因為「時間性」的問題,連無宗教信仰的小炒王都要交畀神來處理,事關我知道幾時爆升的話,我就改名做「神炒王」。

好啦,爆破點來了,小炒王眼見吉利(00175.HK)追唔過(價錢爆到自己買咗都唔安落),就在$8.78於Tasty money節目內推介長城汽車(02333.HK)俾大家,唔推都無嘢,一推就遇著出數據,仲要係吉利按月表現麻麻地之後拖低長城,拖到$8.5,好彩係信念兩個字夠堅挺,結果食到長城單日急升20%的升浪,呢一轉都俾我讚下自己,跌落$8.5時堅忍信念加上叫大家唔好沽,呢下其實好難,因為我捱係我的事,叫人一齊捱係10分滿分的高難度動作。

轉返正題先,叫大家不問價追兩個板塊,其中一個正正就係汽車股。車股輪流炒,得勢不饒人先有吉利,繼而長城,隨後就會係廣汽(02238.HK)、東風(00489.HK)、北京汽車(01958.HK)。甚至連細細隻嘅五菱汽車(00305.HK)、慶鈴汽車(01122.HK)都列入炒作之列。較長城更早推介的汽車4S股,中升(00881.HK)更加推介一日就到目標價,由$12.9升到$13.5,更接住汽車股升勢,再炒多一浸。正通(01728.HK)亦係考慮之列。但升咗上嚟,又有乜嘢好推?從汽車諗到零件,做子午輪胎鋼簾線的興達(01899.HK)就值得係低位撈貨,半年前仲有$3.5,現價$2.8水平,用一條龍思維出發,炒返上$3.5水平不難,加上早前出過盈喜,證明業務有明顯改善,買落都安心啲。其餘敏實(00425.HK)、耐世特(01316.HK)亦係板塊內可取之選。其中耐世特敏感度夠高,適合短炒人士。

另一板塊係資源股。首推洛陽鉬業(03993.HK)。沽空軍來襲令科技股暫且退居幕後,資金輪動到舊經濟股,資源股好大機會再熱炒。

洛鉬收購的鈷連繫到電動車嘅電池原材料,萬一汽車銷售向上,鈷嘅銷量會大增,兼且價格提升,洛鉬首季嘅銅及鈷嘅銷量就急升了4倍,由此可知,洛鉬在資金上及基本面上都係投資首選,$3.1水平(即上次高位)將會一觸即破。最緊要係北水已經投注在洛鉬身上,大家得閒每日睇睇深港通及滬港通流入邊隻股份,我幾次都捉到趨勢股跟炒,千祈唔好偷懶。