接近回歸20周年，暫時睇唔到經濟上阿爺送咩大禮畀香港，但千祈唔好忽視呢個重要日子，事關資金市，借一、兩個消息就可以炒到飛天，記住留定現金呀！我$189買入長線持有的港交所（00388.HK）更加係有大禮概念！
執筆呢刻，小炒王等緊市場公布內地係咪真係入到「摩」，由於前面有重大不確定性，所以我口袋空盪盪，貨少又輕身，更加無打算凌晨4:30爬起身睇結果。舊年尾開始，自己睇大浪漸漸形成，所以好少輕身上路，點算一下，清咗今次貨，今年第一目標將近達成，但今次仲咩買重保險，識得臨崖勒馬呢？
開一開恆指月線圖就搵到答案。連續出五支陽燭嘅機會已經少之又少，今年， 2017年，已經率先出咗五支陽燭。對上一次連出六至九支陽燭就要數2007年，十年一大浪的「7」字年。當年2007年，去到第六個月，陽燭嘅下影線係特別長，更加去到月線圖嘅20天線，之後先識得反彈。以此推斷，連升五個月之後應該會有一次調整，但，但呢樣嘢你同我都唔會知，萬一真係好消息出貨，我又可以再買平貨。若然唔中，在高位補貨就唔會面懵。講真，如果可以避開有機會出現的調整，趁股市低位有現金衝去買貨，真係比人行快100步架。
照你咁講，如果要行到月線圖嘅20天線，即係23,000點喎，有冇可能跌2、3000點啊。你有冇聽過「神龍擺尾」？大牛市條尾震一震你倉，突然震千零點都係非常之等閒，唔調整又點會儲夠力再衝上去？ 千祈唔好以為小炒王睇淡，我自己一直主力睇好，只不過遇著短線調整，出一出貨心曠神怡，令自己冷靜諗下嚟緊買咩貨先係上策。接近回歸20周年，暫時睇唔到經濟上阿爺送咩大禮畀香港，但千祈唔好忽視呢個重要日子，事關資金市，借一、兩個消息就可以炒到飛天，記住留定現金呀！我$189買入長線持有的港交所（00388.HK）更加係有大禮概念！
