專欄

有睇開小炒王節目的朋友都知我有個「小炒倉」，廿萬開波，務求賺到最盡！咁呢排咁多嘢炒，小炒王又大執倉，把心頭好嘅華泰證券（06886.HK）、申銀（00218.HK）等全部沽清，換入中金公司（03908.HK），仲要一注獨贏！好多人問係咪華泰證券唔得啦，要食胡啦，小炒王個人睇華泰中線目標價起碼係IPO 價附近（即係24蚊），有貨嘅食唔食隨你，小炒王個人就買來做長線。至於小炒倉早前唔係點郁，買了滴達（01470.HK）、安寧（00128.HK）、 建溢（00638.HK）、國際娛樂（01009.HK）等來坐，好多網友話好悶，若果大家心水清，就知道其實坐下回報唔錯，不過小炒王又想證明一下，炒股其實唔係咁難，首先就係選好股，第二就係若果股份唔對辦的話，狠心啲講分手，重新上路又無咩所謂，炒股就係咁，唔係輸就係贏啦，太介意輸的話好難更上一層樓。

今期為大家講下點解買入中金公司：

資金要追落後，現情況好似前排港交所（00388.HK）突破200蚊的階段，有聽TASTY MONEY的觀眾一定記得小炒王第一注同大家講係$189，第二注係$217，而家都230啦，小炒王早前推介證券股時講過咩，唔知大家仲記唔記得？係大牛市裡面，一定要擺證券股落倉，因為一係唔升，一升可以升到你唔信，有潛力個啲，係可以幾倍升幅。

上次推介華泰時，已經以新華保險（01336.HK）同中人壽（02628.HK）作比喻，若果大家唔記得就要重溫一下，至於中金公司，可以係新華保險，中國太平咁好的質地，點解？

首先，講下歷史，中金公司全名係中國國際金融股份有限公司（CICC），係中國首間投資銀行I-BANK，當時由建行（00939.HK）同大摩一齊搞的合營，風頭一時無兩，廿年之後，公司成功登陸港股，招股價10.28元，現價約13元一定有交代。

睇返公司新聞，中金公司今年3月獲中證監核准與中投證券進行合併的事宜，核准中金公司通過受讓中投證券50億元人民幣股權（佔出資總額100%）的方式設立子公司，並核准中金註冊資本由23億元變更為39.85億元，令到中金公司除投行業務外，壯大零售客戶基礎，公司規模更double up，小炒王覺得呢個合併好大機會係1+1>2，所以現價仲未反映到呢單合併的好處。

另外，公司除咗收購中投外，仲有一單新聞好爆，就係收購Krane Funds Advisors LLC（金瑞基金），金瑞基金係美國資產管理公司，以其專注於中國的Krane Shares交易型開放式指數基金（ETFs），咁有咩咁勁？唔講大家唔知，金瑞基金係第一家係美國發行MSCI-linked 中國A股ETF，大家都知依家中國被納入MSCI明晟指數，未來一定好多錢流入來，好景程度係大家估唔到咁勁，小炒王好相信呢個併購有助中金在ETF界搶到領導地位。睇返呢幾單收購，絕對係1+1+1>3，分分鐘係1+1+1>5 的好例子，換句話來講，現時股價接近52周新高但仍然係好平時，好值得去建倉。

最後，睇下CICC的股東，有中央匯金、新加坡主權基金GIC、世界知名嘅PE FUND TPG 同KKR，可算星光閃閃，更重要係呢啲大佬做策略股東的話，中金未來係好多deal 做，生意滔滔不絕，加上未來一帶一路咁多project，中金一定係國家隊的開路先鋒，所以小炒王決定用小炒倉去一注獨贏中金公司。