專欄

【不問價追】第四季袋咩落袋?

今次係一個超級牛市,但係中間嘅跌盪同震倉係前所未見,所以各位要綁緊安全帶,好股嘅倉底千祈唔好被震走。

上周淡友趁港股無北水就偷襲,小炒王好多好友都已經沽貨離場,點知外圍爆升,個個都被玩到陀陀擰。一如小炒王所講,今次係一個超級牛市,但係中間嘅跌盪同震倉係前所未見,所以各位要綁緊安全帶,好股嘅倉底千祈唔好被震走。

踏入第四季,有咩股會向好?就同大家簡單講下幾大心水板塊。

電動車相關股

係人都知中國大力推廣電動車,港股的比亞迪(01211.HK)已經升到飛天, 就連停了牌好一段時間嘅正道(01188.HK)都話參與中國寧波市奉化區的新能源汽車項目,同京威等合作方投資過百億去搞,仰融造車夢唔知成唔成功,但係小炒王見到未來嘅市場就係電動車。

當中最喜歡兩家公司,分別係蔚來汽車,呢個係中國版TESLA,傳聞今年有機會量產,而電池方面就係福建嘅寧德時代,正正因為比亞迪做電動車,所以寧德時代主力做其他車廠,更獲得鴻海入股。不過呢兩間好嘢都未上市,一旦上市又可能成為千億市值。咁香港有咩好嘢?小炒王比較喜歡建滔孖寶,建滔化工(00148.HK)同埋建滔積層板(01888.HK),年報話佢哋同大廠研發緊新型電池,若成功,如:三星;LG;Apple都有機會係潛力對象。若不喜歡咁大,中小型企業,例如天能動力(00819.HK)、萬裕科技(00894.HK)都好有潛力,因有產能,更有部份技術專利,係好好嘅收購對象。

5G 股及物聯網/車聯網股

上個月A股已經大炒5G股,雖然話5G 係2018/2019嘅事,但一旦推出,會為市場帶來好大衝擊,因為手機上網速度大大提升,簡單咁講,大家以後睇到小炒王嘅畫可以係1080,或者更高質去到4K。而重點係容量大大提升,未來都行IPV6,每個產品都可以駁上Internet,汽車梗係唔使多講,就連你的旅行篋都可以,大家可以諗下未來會有幾多變化。不過我比較喜歡做信息保安的公司,因為科技愈發達、愈方便,就愈易被黑客入侵,大家都知啦,屋企嘅CAM 都唔安全,何況其他物件要駁向互聯網。

消費型相關股

踏入第四季,又係消費季節開始,感恩節、聖誕節、新年等大節,而家經濟唔差啦,唔多唔少都會買嘢送畀親朋友戚友,小炒王思路好簡單,最直接龍頭係電商股,如AMAZON、 BABA、京東等美股,跟住就係品牌股、服飾股、運動用品股、電器產品股等等,最後先到物料。品牌股可考慮利標(00787.HK),入冬都可能炒一轉,跟住就諗起百麗,可惜已私有化,申洲(02313.HK)同埋南旋(01982.HK)都值得關注,申洲係T-SHIRT龍頭;南旋係毛衣的龍頭,而剛剛注資個間公司,潛力好大,而電子產品梗係諗到做IROBOT的建溢(00638.HK)啦。

環保股

十九大的重中之重就係重見藍天,而習主席希望未來中國可以好似歐洲咁靚,已經向各省施壓,我梗係喜歡環保股啦, 但係羅馬非一天建成,歐美都係污染了幾十年先開始著手搞,所以中國問題好難講評論,只能講希望盡快處理好環境污染問題。小炒王相信中國的速度,好多時係做定唔做的問題。既然環保已經係國家首要位置上,梗係中長線投資,直到北京不再有霧霾,光大國際(00257.HK)、光大綠色環保(01257.HK)、天津創業環保(01065.HK),以及一眾新能源板塊。

扶貧股

若果大家有留意習近平主席, 今年是代表貴州,大家都應該知道貴州山區多,係相對貧窮的一個省份,近期見到不少企業走去貴州投資,例如騰訊(00700.HK)等科網搞數據中心,恒大(03333.HK)更捐過億,而平保阿媽平安集團更加積極,推出首個免息免擔保扶貧模式,料助明年十萬貧困戶脫貧。有咩股份會受惠?大家可以從兩方面去搵,首先係地區性,例如公司係貴州一帶係起廠等,可能有稅務優惠,有地或物業可能升值等等。