【不問價追】5G產業鏈之滄海遺珠

好耐無同大家分享中線投資，趁年頭寫返篇長文俾大家開年。大市咁波動，5G當然最好炒，觀眾都知我們最早同大家推介中國鐵塔（788），$1.16叫買入，大家買都唔想買。現時坊間全部都推介，無息派都講到係高息股，呢個真係要認真去諗下買佢的理念係咩？

鐵塔係一間唔錯的公司，好的地方係有三大電訊商做阿媽，同時間唔好的地方都係呢一度。講到好似好玄咁，但其實好簡單，生意係佢哋俾，對阿爺來講係減少重覆建設，洗少好多錢，但同時間錢又未必賺得深，而且主要客戶基數得三個，議價能力大大降底。若果從股值去講，一間市值超過2000億的公司，淨利潤唔到20億，同小米都差唔幾。但點解Tasty Money會推介? 最簡單係鐵塔納入國指，當時預期北水會過江搶購，因為稀缺性好大，加埋國內5G股東方通訊(600776)用4個月時間由3.7元爆升幾倍到18元，港股呢邊一定熱炒。而同期講的5G股，好多都郁晒，咁5G仲有咩潛力股？

講到呢度，相信大家都估唔到小炒王會講呢個版塊，因為都衰左好幾年，就係電力板塊。未講原因，小炒王好簡單講下自已對5G的認知，基本上就係速度快了好多倍，會帶來商業應用如物聯網、車聯網等⋯都有好大潛力。

大家都知道所有大佬企業都走去做車，早排新聞有恒大健康(708)宣佈收購瑞典電動車公司NEVS 51%股權，蘋果電動車TITAN近期都曝光，三星、LG、QQ等巨企都佈局緊，好明顯同大家講5G年代，最大契機就係電動車，小炒王在2019年開局可以同大家預視到少少未來，係咪好值錢呢⋯

電動車用電我都知，咁都關5G事，未免太過強行? 5G波長短、速度快，同時間所用的能量都大，網上有預測講過，到2025年通訊行業將消耗全球20%的電力，隨住5G的高速傳輸，海量的數據都必將倍增。有統計指出每GB流量約消耗2千瓦時的電量，也就是說下載一部1GB的電影相當於你屋企的2000瓦吹風機吹咗一個鐘。

除用電大增之外，同時產生大量的熱能，如果大家有了解過礦機礦場就知，電費高而且好熱。IEEE Spectrum 發表了一篇名為《The 5G Dilemma: More Base Stations, More Antennas—Less Energy?》文中指出，5G的潛在威脅是：提供高達1000倍於現網的數據，也意味著高達1000倍的能耗。Massive MIMO 將增加5G基站總能耗，
儘管5G小/微基站的能耗遠低於傳統基站，但分布更加密集，會導致網絡的總能耗上升。未計電動車的需求，單係5G就已經令到電力需求大增，可想而之電力股的潛力有幾大。

如果有跟進5G 的消息，就知道連中國一哥華為都面對緊呢個技術問題，去年8月DigiTimes報道指出華為首款5G手機將比4G手機消耗更多電量，顯然需要一個優質的銅制冷卻模塊來散熱。華為輪值董事長徐直軍（Eric Xu）證實，華為5G芯片的耗電量將是目前4G芯片的2.5倍，需要進一步研發以改善5G芯片的散熱和節能技術。

單單咁睇，小炒王就知道有咩股係嚟緊幾年的倍升股，中長線去睇，電力股絕對值吸。如果大家有認真去想過點解巴菲特2017年底買電力配送企業Oncor，2018年買蘋果，點解誠哥投資咁多能源配送的基建，小炒王覺得佢哋提前佈局緊未來。

電力股咁多隻，小炒王鐘意華能(902)同華電(1071), 因為佢地同煤價敏感度高, 而且仲有國企重組整合的大機會，好多人都會話「煤電聯動」，煤價近期升咗喎，睇多啲新聞先，未來幾年，煤價升跌影響唔會大，因為好多電企同中煤（1898）鎖定了535人民幣呢個價，即係話暫不受影響。而華能仲有重陽投資呢個私募基金大佬收貨，小炒王堅定相信人哋係放長線約大魚，就不問價吸華能（902）。

小炒王梁心欣 Facebook專頁

https://www.facebook.com/samyanleung/