【雷神教路】油價逆襲 國泰I CAN FRY?

大家好, 雷神第一次寫專欄, 精算出身既我對數字比較靈敏, 但文筆唔算太好,若果寫得唔夠好希望大家見諒。上星期雷神就係Facebook貼了簡單既睇法, 今日呢篇文就詳細一點分享一下我對國泰短線既看法。

過去燃油對沖合約勁蝕 國泰股價無運行

國泰航空過去幾年賭油輸爆廠, 相信大家記憶猶新, 引用17年5月蘋果日報既新聞, 《燃油對沖三年輸180億 去年更蝕到入肉》:「國泰在過去六年以來，燃油對沖在2011至2013年間，曾為公司合共帶來33.42億元溢利，但在2014年以來，卻連續三年錄得虧損，其中在2014年已錄得9.11億元虧損；2015年虧損更達到84.74億元，但這兩年來仍然錄得整體盈利；直至去年，84.56億元的燃油對沖虧損，過去三年合共已輸近180億元。」

根據股榮既一篇專欄, 講到國泰過去8年對沖油價平均價, 由15年既95美元一桶去到17年既90美元一桶, 18年仲要81美元, 係17年中油價仲係55蚊既時候, 望住呢個表, 都真係令國泰股東幾灰心, 因為一路捱緊其他無做對沖既航空公司平價競爭之餘, 一路仲要係對沖油價個PART勁蝕錢。

油價成本高 競爭力下降

如果大家有留意中期報告, 就會發現客運量以及收益率係上半年做得唔好, 好簡單去諗下, 就係係呢轉油價大跌既時候, 好多對手公司以及廉航因為無做燃油對沖或者做得好少, 係咁既情況下, 佢地既燃油成本相對國泰來講自然平好多, 唔駛多講機票既價格平過國泰都好正常, 係咁既情況下, 國泰呢幾年都出現捱打既局面。

 

油價見曙光 國泰翻身戰

不過踏入2018年, 全球牛市沖天, 更重要係環球經濟見底回升, 加埋地緣政治既因素, 以及未來沙特阿美上市既陰謀論, 油價開始進入牛市既情況。根據外媒報導, 對沖基金大佬賭緊石油輸出國組織(OPEC)將過度收緊原油供應, 佢地積累既原油、汽油以及取暖油既期貨及期權淨好倉規模創紀錄新高, 超過11.8億桶, 目前好淡倉比例係超過9:1, 好明顯好多大佬已經部署緊2018年油價反底回升既大格局。

 

若果大家望一眼以下呢幅布蘭特期油走勢圖就知, 係2017年下半年開始見底回升, 跟日升到67-68蚊水平, 國泰燃油對沖既合約, 輸幾左十幾蚊, 若果呢個升勢持續到2018年尾既話, 國泰今年81平均既對沖成本, 分分鐘有機會掉轉槍頭變盈利, 同時間其他對手無做對沖既話, 可能未來就要捱貴油。風水輪流轉既情況下,  雷神覺得國泰18-19年可以打返場翻身戰。

 

 

客運貨運數據改善

航空公司主要睇幾個數據, 最簡單就係客運量同貨運量, 收益率（Passenger/Cargo yield）及運載率（Load factor）, 若果大家有留意國泰每月公佈既十一月份客、貨運量數據, 就會發現下半年每個月都愈做愈好, 係十一月個份數據入面, 國泰航空商務及貨運董事林紹波表示：

 

「11 月份的客運業務回升走勢持 續，尤因去年同期，香港航班班次按當局要求而有所削減，因此上月的 運力相比之下有所上升。頭等及商務艙的客運量增加，帶動客運收益 率，經濟艙亦表現理想，而加拿大、歐洲和英國等航線的需求更趨強勁。此外，日本紅葉季節亦推動香港及東南亞各地（包括新加坡）前往 日本的需求。 」

 

「貨運方面，全球空運市場整體表現強勁，國泰的載貨量亦錄得按年高 增長。與電子商貿有關的貨運得到內地雙十一等促銷活動帶動，令運載 率高企及改善收益，抵銷感恩節過後貨運需求回軟的慣常。11 月 26 日起 計的每週載貨量創新高，而部分主要市場銷售額在月內亦創新紀錄。整 體而言，貨運業務前景樂觀，並預期升勢能持續到聖誕假期。」

 

雷神認為1月中會出既既數據預期應該繼續好, 分分鐘會超出預期, 到期時一出來後, 可能會成為股價上升既催化劑, 現時好值得去搏一轉國泰大翻身。

http://www.hkexnews.hk/listedco/listconews/SEHK/2017/1218/LTN20171218347_C.pdf