【不問價追】中移加阿里 鳳凰重生記

上個星期， 小炒王推介左萬達酒店(169)， 大品牌小股票，呢個係最好炒嘅一個概念，大品牌人人都識， 同埋時間實力有翻咁上下，而小股票(其實都唔小)，只因為18年所有股都無人問津，股值暴跌先變成小股票。在event driven，因為有投資價值，資金最buy呢類股份，大家即市仲可以JEP 幾轉。今日同大家分享個隻，品牌都唔錯，近期同中移動及阿里合作之後，公司又有幾多動作，股價都行得好靚， 睇個樣19年會大翻身，呢間野就係Tasty嘅老前輩股鳳凰衛視(2008)。

喺2018年11月16日，公司宣佈與中移動通信集團進行之新媒體持續關連交易，即係租用中移動 Data Center，同時間中移動向鳳凰衛視買內容，睇落去係Win-Win Situation，無野特別。但係同日委任中移動董事及副總經理入來做非執董，呢個舉動睇嚟為中移動未來可能出現嘅大動作埋下伏筆。​小炒王有幾個諗法，是旦一個都係大龍鳳，睇公司近日股價走勢就略知一二啦​。

 

中移動簽完之後，喺2018年11月19日鳳凰衛視再出通告，話喺11月16日同阿里巴巴訂立了一份戰略合作備忘錄。訂約雙方表示了在節目內容、產品、平臺以及雲計算、大數據等互聯網技術方面，開展深化合作的意願，並將探索在跨界創新、資本投資、中台技術共用、達摩院科創轉化與傳播等領域的合作可行性，及在該備忘錄的一年有效期內簽署有約束力的 戰略合作協議的意向。

阿里緊隨其後，鳳凰衛視明顯就係進行改革，股價當日爆升到$0.94後，做圓底再上。上週五收$0.95，睇個樣準備再突破​。

喺今年1月8日，鳳凰新媒體副總裁、鳳凰網總編輯鄒明出席2019新榜大會，宣布鳳凰網大風號 2019年將同時進行風鈴計劃、金風計劃、和海外自媒體聯盟三大計劃，並投入10億資源從五大方面補貼自媒體作者，鼓勵自媒體作者長期生產高品質內容，​而佢地鳳凰秀嘅新平台，目標就係挑戰【今日頭條】。小炒王覺得都幾吸引​。

跟住喺早幾日2月25日，附屬公司鳳凰新媒體(美國上市個間)出售於Particles Inc.的投資，總代價 4.48億美元，即係35.16億港元。呢間野係今日頭條其中一個對手，【一點資訊】， 鳳凰新媒體由A輪開始投資嘅項目。呢間野重組之後就上創科板，養到咁大再賣，回報都幾豐厚。​睇下鳳凰衛視市值先得 47.44億，估值絕對唔合理，係超級平，平到你唔信。

 

 

喺上星期五，公司再出通告，收購北京易天新動網路科技有限公司之權益，用1.44億人民幣收購【塔讀】25.5%股權，買完之後持有51%股權，成功拎到控制權。呢間【塔讀】係咩，​簡單講就係閱文(992)嘅翻板，現時每日活躍用戶(DAU)過百萬， 比起閱文梗係差好遠，人地幾百億市值，上市炒到近千億，反而呢間現時先5億幾總值，有潛力好似【一點資訊】咁養大再賣。 鳳凰投資【一點資訊】5年賺9倍，獲利以十億計，所以呢次投資又照板煮碗無難度​。加埋鳳凰自身嘅翻閱平台，協同效應一定有，重點係IP嘅整合，大家知道互聯網最緊要就係內容同用戶，鳳凰本身兩方面都好齊全，所以真係好有實力。

鳳凰衛視相信好多人都知，而喺海外既華人，好大多數都係睇緊鳳凰衛視雖然互聯網咁發達，但大多數時間佢地都係睇呢台，就好似TVB嘅慣性收視咁勁。鳳凰衛視係海外華僑嘅資訊平台，可想而知個戰略價值有幾高，可以話係兵家必爭之地​。今日中移阿里率先進場，因為鳳凰衛視需要改革，更大原因係唔屬於阿里同騰訊陣營嘅【今日頭條】係愈來愈勁同時間突顯咗鳳凰衛視價值所在。況且而家咁平，裡面嘅物業資產同擁有嘅IP 都唔只呢個價，只係過去風口未到。如果大家睇下10年圖就知，而家跌到09年個海嘯底， 之後幾年股價最高炒到上$4個幾，12-15年維持係$2 -$3.5水平，現時真係好平好抵。而且公司真係做緊野，中長線一定重上$2-3呢個水平，​短線睇住$1.2先，中線$1.6-1.8應無走雞,。如果有阿里或中移入股呢類驚喜嘅話，就目標$3-4，真係要不問價追住來炒。

小炒王梁心欣 Facebook專頁

https://www.facebook.com/samyanleung/